దసరా తర్వాతే డీఎస్సీ మెరిట్ జాబితాలు

రాష్ట్రంలో 21,343 ఉపాధ్యాయ పోస్టుల భర్తీకి నిర్వహించిన డీఎస్సీ రాత పరీక్షకు సంబంధించిన జిల్లాల వారీ మెరిట్ జాబితాలను దసరా పండుగ తరువాతే జిల్లాలకు పంపించాలని విద్యాశాఖ నిర్ణయించింది. ఇటీవల రాత పరీక్ష ఫలితాలను విడుదల చేసిన విద్యాశాఖ ఈ నెల 8 నుంచి అభ్యర్థుల ఆన్‌లైన్ దరఖాస్తుల్లో తప్పుల సవరణకు అవకాశం ఇచ్చింది. గురువారంతో ఈ గడువు ముగిసింది. దాదాపు 4,500 మంది అభ్యర్థులు దరఖాస్తుల్లో పొరపాట్లను సరిదిద్దుకున్నారు. ఇక అభ్యర్థులకు సంబంధించిన రాత పరీక్ష మార్కులను, ఉపాధ్యాయ అర్హత పరీక్ష (టెట్) మార్కులను కలిపి జిల్లాల వారీగా మెరిట్ జాబితాలను రూపొందించే పనిపై దృష్టి సారించింది. ఈ ప్రక్రియ పూర్తయ్యేందుకు మరో 10 రోజులకు పైగా సమయం పట్టనుంది. దసరా పండుగ తరువాతే మెరిట్ జాబితాలను హార్డ్ కాపీలతోపాటు సాఫ్ట్ కాపీలను జిల్లాలకు పంపనుంది.